بسم الله

راح أتكلم اليوم (ببساطة) عن اللي صاير في سوق الأسهم الأمريكي بحكم ارتباط موقع #ريديت في الموضوع بشكل أساسي ..

اللي صار الأسبوع الماضي جعل طلاب الجامعات يفلسون أثرياء، كيف؟

حياكم بالثريد

الموضوع كله بدأ من شركة Game Stop اللي كانت المسيطرة على سوق الألعاب في بداية الألفية وكوّنت مجتمع محب لها بشكل كبير، مع انتقال العالم للأنترنت فشلت الشركة بالانتقال معهم وبقت في المحلات الاعتيادية وهذا اللي سبب لها انحدار ..

وصل سعر الشركة إلى أقل من دولار وخلاص الشركة راح تفلس قريب لكن اللي حبّوها وهم صغار قرروا يساندونها يوم كبروا، كيف؟

خلونا نشرح سوق الأسهم بأبسط طريقة:
قيمة الشركة عبارة عن أسهم، إذا كل الناس بيشترون أسهم الشركة راح يرتفع سعرها، وإذا ما يبونها راح ينزل سعرها ..

طيب نجي الحين لمنصة اسمها (روبن هود) وبشكل مختصر هي منصة تخليك تبيع وتشتري بسوق الأسهم بدون رسوم على العمليات (بس تشترك 20 دولار شهريا تقريبا) مثل نتفليكس..

هالمنصة خلت الكل يدخل سوق الأسهم، ومن ضمنهم مستخدمين #ريديت

صفحة r/WallStreetBets هي صفحة بريديت لأشخاص أغلبهم جدد على سوق الأسهم ويشاركون صفقاتهم اللي نجحت واللي فشلت، في نهاية 2019 قرر مجموعة أنهم يشترون في الشركة ويرتفع سعرها واتفقوا انهم ما راح يبيعون إلى ما تصل 1000 دولار !

هذا شخص في 2019 اشترى بقيمة 50,000 دولار بالشركة وكان يراهن بارتفاعها ..

الحين كم تتوقعون وصلت ثروته؟

أكثر من 7 مليون دولار!!

الحين لازم نفهم مفهوم مهم جدا وراح يلعب دور في إفلاس الأثرياء ..

(SHORT SELLING)

بشكل مختصر:
خلنا ناخذ ثلاث أشخاص/
تاجر (معه أسهم)
مستثمر (يسوي S.S)
طرف ثالث (يشتري أسهم)

والشرح تحت

تبدأ من مستثمر يتوقع شركة بتنزل بعد أسبوع، يروح لتاجر من هذي الشركة و(يقترض) منه سهم بقيمة 10 ريال ويروح يبيعه لطرف ثالث ويكسب 10 ريال ..

تمام؟

المستثمر (مُلزم) بعد أسبوع انه يرجع السهم للتاجر بسعره الجديد، لو كان سعره الجديد 2 ريال هو كسب 8 ريال، لو سعره 17 ريال هو خسر 7 ريال

طيب، ليه WBS اختاروا قيم ستوب؟ البداية كانت قبل 4 شهور أحد أعضاء WBS لاحظ أنه فيه شورت سيلنق كبير على قيم ستوب وتوقع أنه مع نزول أجهزة الجيل الجديد وشراء المستثمر المعروف (راين كوهن) لـ13% من أسهم الشركة راح ترتفع أسهم قيم ستوب ومنها خسارة للشورت سيلرز وفرصة للربح
(البوست)

مع مرور الأسابيع، الزخم حول أسهم GameStop في الصفحة تزايد بشكل كبير..

وكره الأعضاء للشورت سيلرز بحكم أنهم يكسبون بمراهنتهم على خسارة غيرهم كانت دافع أكبر وأكبر انهم يشترون زيادة..

وفي 27 يناير أغنى رجل بالعالم (إيلون مسك) نزل تغريدة بكلمة وحدة رفع فيها أسهم GameStop بأكثر من 92% أو مايعادل 148$ للسهم الواحد..

طيب ليه إيلون مسك كتبها؟

حرب (إيلون مسك) مع الشورت سيلرز على شركته تيسلا قديمة..

بدت مع الشورت سيلرز في 2020 انهم تراهنوا على خسارة تيسلا، ومع ارتفاع أسهم تيسلا ب742% في 2020 الشورت سيلرز خسروا أكثر من 40 مليار دولار في سنة وحدة بس!!

الشركات اللي خسرت من GameStop كثيرة لكن الأبرز هم Melvin Capital وصندوق Citadel ..

كم تتوقعون خسارتهم؟

5.05 مليار دولار تقريبا!!

ليش؟ لأنهم يتاجرون بالـSHORT SELLING اللي شرحناه فوق

طبعاً هالشركات ما جلسوا ساكتين، أمس ضغطوا على (روبن هود) وقررت الشركة انها توقف سهم GameStop من التداول وهذا اللي جعل الناس تشبّ

كثير من المؤثرين تدخلوا، وهذي صور تغريداتهم:

بعد الضغط الكثيف عليهم أمس ومظاهرات عند مكتبهم الرئيسي قرروا انهم يفتحون التداول على السهم اليوم الجمعة ..

السالفة هذي كلها تكررت على 4 شركات تقريباً:
1. GameStop
2. AMC
3. Blackberry
4. Nokia

ارتفعت أسعارهم بشكل غير متوقع خلال الأيام الماضية ..

أخيراً ..

سهم GameStop الآن قيمته 338 دولار ومخططين انه يوصل 1000 دولار، لكن هل بيوصلون لهدفهم؟

محد يدري..

لو أعجبكم الثريد تعليقكم يحمسني جداً وإعادة تغريدها يسعدني أكثر ..

شكراً