Read on Twitter
فى قصة حاصلة فى البورصة الأمريكية بقالها كام يوم مبهدلة الدنيا والموضوع مسلى أوى. شوية عيال على reddit قلبو الدنيا والتايملاين مقلوب بقاله كام يوم. هحكيلكو القصة عشان عجبانى وأنا زهقان ومش عايز أعمل حاجة من اللى ورايا. ثريد.
فى تغيير رهيب حصل فى شراء الأسهم فى أمريكا فى آخر 10 سنين. ظهر تطبيق جديد اسمه روبنهود Robinhood ، دة تطبيق بيخليك تشترى أسهم بس بدل ما ياخد عمولة زى أغلب سماسرة البورصة ، بيخليك تدفع اشتراك شهرى 10-15 دولار وتشترى وتبيع براحتك بدون عمولة.
مع الوقت ناس كتير بدأت تضارب فى البورصة فى أمريكا وهما مش فاهمين فيها أى حاجة ، بينزلو روبنهود ويشترو أسهم. لدرجة إن فى ناس بتقول إن سبب ارتفاع الأسهم الحالى ما يسمى Robinhood investors ، اللى هما الناس اللى بيشترو أى حاجة من على روبنهود وهما مش فاهمين حاجة.
عالجانب الآخر ، فى حاجة فى الاستثمار اسمها Short selling (معرفش اسمه بالعربى) ، الShorting دة فكرته إنك بتستلف سهم وتبيعه ، بس مجبر تشتريه تانى فى المستقبل. لو السهم سعره نزل بتكسب فلوس ، لو طلع بتخسر.
مثلا تخيل إنك استلفت سهم وبيعته ب30 دولار ، لو وصل 20 هتشتريه تانى وترجعه لصاحبه وتاخد انت ال10 الفرق فى جيبك ، بس لو طلع ل40 هتضطر تشتريه عشان ترجعه لصاحبه وكدة هتبقى خسرت 10 دولار. وهكذا.
مشكلة الshort selling إن الخسارة فيه مالهاش ليميت ، ﻷن السهم سعره ممكن يفضل يزيد إلى ما لا نهاية. فالناس لما بتعمل كدة بيحددو أقصى سعر يقدرو يتحملو عنده الخسارة ، ﻷن فى النهاية هما مجبرين يشترو تانى السهم اللى باعوه ولازم يبقى معاهم فلوس تكفى.
كان فى بقى شركة فى أمريكا اسمها Gamestop ، دى سلسلة محلات بتبيع ألعاب كمبيوتر وأغلب محلاتهم فى مولات. فطبعا مع الإنترنت وأصلا المولات بتنهار فى أمريكا ، مبيعات الشركة دى عمالة تقل والكل متفق إنها هتفلس قريب. وبالتالى سهم الشركة دى اكتر سهم عليه عمليات short selling فى أمريكا.
أغلب اللى بيعملو short selling دول بيبقو شركات كبيرة بيحطو ملايين ومليارات. لو حد شاف فيلم The big short هيفهم قصدى.
المهم بقى من كام يوم ، فى منتدى على موقع reddit عليه ناس بتهرى فى المتاجرة فى البورصة ، ففى شوية عيال قررو يعملو ميمز على ليه سهم Gamestop هو أهم سهم لازم كل الناس تشتريه ، وفعلا الموضوع بقى viral وانتشر بشدة وناس كتير قعدت تشترى أسهم الشركة.
السهم طلع من حاجة و30 دولار ل150 دولار فى كام يوم. وكمان إيلون ماسك راح كاتب تويتة ومشير لينك المنتدى اللى على reddit ، ومن ساعتها السهم عمال يطلع بجنون ودلوقتى كاسر ال330 دولار والشركة بتفلس أصلا 
طبعا ناس كتير من اللى كانو عاملين short selling خسرو فلوس بالعبيط. دى كانت فرصة شبه مضمونة ليهم ﻷن gamestop بتفلس ، وشوية عيال على reddit وقعو funds بمليارات بشوية كوميكس وميمز. والناس فى أمريكا هتتجنن والتايملاين الصراحة ممتع بقاله كام يوم.
دة أحد الfunds اللى كانو عاملين short selling بمليارات على سهم Gamestop https://twitter.com/__fembot/status/1354214556608966664
تأثير الدومنة من وجود أبلكيشن زى روبنهود :D https://twitter.com/awealthofcs/status/1354080908081508352
دة تيك توك عامله ناس من اللى بيتقال عليهم Robinhood investors https://twitter.com/Carnage4Life/status/1350876743788187649
ودة واحد بيسف على أنصار البيتكوين :D https://twitter.com/fchollet/status/1354502571243626497
