Read on Twitter
ثريد طويل شوي عن التناقض الروحي والتربوي في الشخصيه العربيه في مجتمع غربي وليش الي يسافر يقول الغربه صعبه واغلب الليبيين ليش سافروا وقروا بس روحوا وسكنوا واستقروا رغم الظروف في ليبيا (اقرا لو ناوي الهجره خصوصا لامريكا)
1-المجتمع الغربي لما تكون من خلفيه عربيه وخصوصا من دوله مزقتها الحرب كيف ليبيا صعب التأقلم فيه. لما تعيش في وسط اجانب او تعيش معاهم في نفس البيت حتتاقلم وتعيش حياتهم بس مع مرور الوقت تبدا تلاحظ تناقض بين حياتك الي عايشها ومجتمعك وظروفك كانسان طالع من دوله فالعالم الثالث.
2-حتمشي لحفلات عيد ميلاد لاطفالهم وحتتذكر طفولتك وبداية الثوره والمعاناه الي مرت عالدوله في وقتها. حتشوف ابهات وامهات يشجعوا فاطفالهم انهم يكونوا الي يبوه ويتصرفوا على طبيعتهم وحتتذكر انك في صغرك لبست قناع رجوله مزيفه وتعلمت القسوه والعنف وتبلد مشاعر بس عشان "ما يقصروش فيك"
حتشوفهم يشكوا ان وحده من الطرق معبيه شرطة مرور يعطوا فمخالفات بينما طريق مدينتك ما من الي تعرفه مات فيها او انقلب فيها بسبب عدم الاهتمام فيها. حتشوف مراهقين ينلزوا من الحوش بعمر ال18 وتستغرب وتحمد ربك على اهلك.
3-حتكون علاقات عميقه مع البعض منهم وتقعد مش حامل فيهم شي بس حتقعد عارف في داخل روحك ان في عقيدتك الي تأمن فيها على الارجح حيخشوا جهنم. حتاكل وكال ياباني وكوري ومكسيكي بس حتحكيلهم ع وكالك في ليبيا وحيستغربوا كيف تاكل في مصارين وتشرب في لبن حامض.
حيخطم عليك الجاهل فيهم وحيعزقلك دوس عنصري ولا يسبك لانك مسلم عربي وحتزعل بس حتتذكر ان هذا لو جا لدولتك بمراته وعيلته مستحيل يخلوهم في حالهم. حتكتشف ان مجتمعهم متقدم بس لانهم ما يأمنوش بالاخره ويخافوا من الموت بشكل رهيب. واغلب مشاكلهم لانه عندهم عقده روحانيه ورعب من فكرة الموت
بينما في مجتمعك الموت مش موضوع بالعكس يحيط بيك في كل مكان والمواطن ما يحاولش يحل اي مشاكل دنيويه وراضي يعيش فالكناسه ويسوق بلا حزام لانه الموت ( قضاء وقدر) ولاته متأكد ان حيحصل حاجه افضل بعد الدنيا فمش مدور. السياستين فالحياه هذن غلط
هنا يا عزيزي الحالم بالهجره حتكتشف ان من المستحيل تكون واحد منهم لانك ما تربيتش في بيئتهم وحتعيش وانت عارف بينك وبين نفسك انك مش لهم ومع ذلك حتنقطع علاقاتك بناسك في دولتك لانهم ينظرولك على انك "وهمي" او مانكش واحد منهم ( والله تغيرت علينا يا ابراهيم)
حتعيش بين نارين والحل الوحيد يكون لو قررت تتاقلم مع المجتمع الغربي بعيدا عن الاضطهاد يا تقلع الهويه العربيه الخاصه بيك وكل تجاربك فالحياه وتبدا من الصفر فوسطهم وتخسر التواصل مع مجتمعك الليبي او العربي او تتقبل شخصيتك العربيه ومجتمعك بخيره وشره وترد بينهم
لكن لو عشت فالنص حتكون ديما تستشعر في انك مش صادق مع نفسك وحتشوف روحك تخسر فالناس حولك سواء كانوا من بلادك ولا من الدوله الي انت فيها وحتحس روحك ديما وحيد وغير مفهوم وفي غربه
