Students ko advice hai ke class ka theme ya subject dekh ke lenay ke bajaya professor dekh ke class lein. Bohot der mein ye baat samajh ai. Aur bohot se aisay mauqay miss ho gaye jis se bohot kuch seekha ja sakta tha.

Bohot se genius professors se magar seekhnay ko phir bhi mil gaya. Yeh practical to nahin lagta tha ke aik class tax ki lo aur agli human rights ki magar iss se zyada practical baat ho hi nahin sakti thi ke anokhay aur genius minds se mukhtalif tareeqon se sochna seekha.

Aur doosra ke mind to alag baat hai, naram dil aur aik understanding aur aik intellectual humility ka koi muqabla nahin. Insan achay milain to chahay koi Einstein level na bhi hon Bohot kuch seekha ja sakta hai.

Aur sab se barh kar jo cheez inn sab se seekhnay ko mili wo yeh thi: ke zindagi mein raha kaisay ja sakta hai. Kis narmi se aur kis politics ke saath.

Aik meray intihai pyaray professor thay Ghana se. Wahan ke a’een ki drafting committee pe serve kar chukay thay. Ab boorhay ho gaye thay, email waghaira istimaal nahin karna seekhay thay na hee seekhna chahtay thay.

Class mein DVD nahin abhi bhi VCR cassette chalatay thay, class ke doosray bachay jo zyada tar goray thay inn ko koi sathyaya hua buddha samajhte thay.

Unn se raabta sirf ya to unn ke office ki landline se ho sakta tha ya kamray ke baahir intizar kartay raho ghanton. Mein yehi karta tha. Bahir bethay raho, kabhi to mulaqat ho hee jaye gi.

Kahan jayen ge bach ke?

Acha unn ke darwazay ke baahir bohot se poster lagay rehtay thay. Aur sab ka aik hi unwaan tha: keh ghurbat hamari zindagi mein hi khatam ki ja sakti hai.

Ab jo mein ghanton uss darwazay ke bahir guzarta yehi sochta rehta ke bhai ye kis kisam ki baat hai. Ghurbat Bohot bari cheez hai, Pakistan mein hi iss ko khatam karna namumkin lagta hai ye to dunya bhar ki baat kar rahay hain.

Khair kabhi sharmatay hue ahistay se khatkatata, kabhi zameen pe gir ke darwazay ke neechay se jhanknay ki koshish karta ke pata nahin andar hai professor ya bahir.

Khair baaki students inn ko na maantay thay. Mazaak uratay thay ke dekho Baba kis zamanay ka hai, email bhi nahin istimaal karta aur uska scarf dekho, uss pe Northwest Airlines likha hai, kaisa mufta admi hai kisi airline se chura laya hai.

Mujhe yaqeen tha ke ye aik bohot special admi hai. Aik to jis maqsad ke liye saari zindagi guzar di—ke dunya mein ya at least apnay mulk Ghana mein ghurbat kahin se khatam ho jaye—aur doosra ke unn ki aankhon ki narmi, chehray pe aik sukoon.

Aur teesra ke jab bhi milta to poochta, “how is your mother?” Aur uss waqt mein apni amma ko haftay mein 1 dafa se zyada call nahin karta tha. Ajeeb o ghareeb website se calling card le ke phone lagana parta tha Pakistan.

To mujhe yaad dilata ke school aur school ke kaam ke ilawa aur bhi cheezain hain zindagi mein. Mujhe ab ja ke iss choti si baat ki ehmiat samajh ayi.

Behrhaal jab mulaqat hoti to ghanta to kamaskam kahin nahin jaata tha. Uss ek chotay se kamray mein jis mein kamsekam koi 10,000 kitabain to hongi aur shelfon ke beech aik choti si desk jis pe aik mamooli sa lamp aur puranay zamanay ka phone.

Aur Professor sahib ko Pakistan choro lagta tha ke duniya ke saaray third world ke mumalik ke baaray mein har cheez pata hai. Mein to hakka bakka reh jata. Yeh kaisay ho sakta hai.

Acha jab graduate honay ka time aya to Professor sahib se mainay kaha recommendation likh den. Kehtay achay iss time pe iss date pe meray kamray mein aana likh doon ga.

Uss din mein in ke daftar pohonch gaya. Unnhon ne aik pad nikala uss mein se do varq phar ke ghanta bhar kuch likhtay rahay.

Mein utni der unn ki bookshelves ko hi taarta raha. Aik taraf dekho to Caribbean mumalik ki taareekh, doosri taraf Bihar aur Bengal ki politics ki kitabein. Kuch aik jannat si lag rahi thi ye aur aisi zindagi.

Dar bhi tha ke Professor sahib ne bitha ke rakha hua hai pata nahin kya chahtay hain kya likh rahay hain. Kuch aisa na likh den master’s degree ke chances hi thap ho jayen.

Acha jab likh chukay to woh yellow pad ke kaghaz mujhe thamaye ke jao iss ko type kar ke lao. Phir mein parhoon ga aur phir iss ko tum bhej dena jahan bhejna hai.

Acha jab meinay type karna shuru kia hostel mein ja ke to Professor sahab ne akhri line mein likha hua tha, “He reminds me of myself when I was at that age.”

Ab sochain Professor sahab Harvard aur University of Chicago ke parhay hue thay, main to inn dono university se nichlay darjay ki University mein parh raha tha. Aur upar se itnay baray admi, kisi mulk ka aa’een likhna koi choti baat to na hui na.

Main nahin yaqeen kar sakta tha ke ye meri hi baat ho rahi hai. Magar phir bhi kuch khushi dil ke kisi konay mein to hui, mein woh alfaaz bhool to nahin sakta tha. Admi na bhi yaqeen karna chahay apnay baray mein koi aisi achi baat to phir bhi kuch to mehsoos hota hai.

Bohot saalon main khamoshi se woh chand alfaaz dil se laga ke hi chalta phirta raha. 6-7 saal guzar gaye mujhe sharmindagi si rahi ke Professor sahib ne itni bari cheez likhi thi mein uss ke qaabil abhi tak nahin ho paya.

Kuch maheenon pehlay mujhe achanak se darr laga ke kahin Professor sahab ko kuch ho to nahin gaya, mainay itnay saalon mein poocha bhi nahin. Waisay bhi umar uss waqt hee kaafi thi jab unnhon ne mujhe parhaya tha.

Phone lagaya to aik do haftay koi response na mila. Kaifiyat si rahi, aik dar sa laga raha. Phir department ko phone milaya to unhon ne kaha nahin aisi pareshaani ki baat koi nahin hai, bas aaj kal daftar aana jana itna nahin rehta. Ghar se class class se ghar nikal jatay hain.

Phir aik din phone aya to Professor sahab ki awaz aik kisi aur zamanay se kaan mein pohonchi. Mein uss waqt ghar se kahin nikla tha chalta ja raha tha, aik dam se deewar se lag ke khara ho gaya.

Professor kehtay hain main kal parson hi tumhain yaad kar raha tha. Aik do meray paas Pakistani larkay aye hain class mein, mein un ko bata raha tha Ansari naam ka mera aik student tha laadla.

Professor kuch afsurda se hogaye jab meinay bataya ke meri abhi shadi hui hai mein America aya hoon biwi ki yahan naukri hai pata nahin waapis University jaoon parhanay kabhi ya nahin.

Meinay kuch behlanay ki koshish ki nahin behlay phir baat khatam ho gayi phone band kar dia. Uss din pareshani si rahi aur abhi tak pareshani si hi hai ke Professor sahib kya bari tawaqqoat rakh baithay hain mujh se kya mein kisi choti si hadd tak bhi iss ke kaabil hoon ke nahin?

Parhnay ka shukriya.